Kaunti

Wenyeji wa kaunti ya Lamu wameonywa dhidi ya kubeba panga ua kisu katika kaunti hiyo.
Haya ni kulingana na kamishna wa kaunti hiyo Irungu Macharia ambaye amehoji kuwa baadhi ya vijana wamekuwa wakitumia silaha hizo katika kutekeleza uhalifu.
Kulingana na Macharia ni kuwa hadi kufikia sasa visa vya wizi wa kimabavu vimeongezeka kwa kiwango kikubwa katika kaunti ya Lamu na kuwaonya wanaotekeleza uhalifu kuwa watakabiliwa kwa mujibu wa sheria.
Macharia amewahimiza viongozi wa kisiasa, wa kidini sambamba na wa Kijamii kutafuta mbinu za kutatua mizozo katika jamii ili kudhibiti visa hivyo.

Gavana wa kaunti ya Kilifi Amason Kingi amesema kwamba amemaliza siku 14 ambazo amekuwa kwenye karantini na baada ya vipimo hajapatikana akiwa na maambukizi ya virusi vya Corona.
Katika taarifa yake kwa vyombo vya habari kwa mara ya kwanza baada ya kutoka kwenye karantini Kingi ameelezea mikakati ambayo imewekwa na serikali ya kaunti ya Kilifi katika kuhamasisha umma kuhusu ugonjwa wa Covid- 19.
Amehoji kwamba Wananchi ambao biashara zao zimepigwa marufuku wameorodheshwa kama baadhi ya wakazi watakaopewa kipau mbele katika mchakato wote wa kupewa msaada wa kifedha na chakula.
Vile vile Kingi amesema bunge la kaunti ya Kilifi liko katika harakati za kupitisha bajeti ya ziada ya takribani shilingi milioni 220 ambazo zikipitishwa zitalenga kununua madawa na vyakula kwa familia zilizoathirika pakubwa kiuchumi kutokana visa vya virusi vya korona kaunti ya Kilifi.